H1N1, 2012 და სხვა მავნებლობანი... ანუ ვძრწით!

როგორი საშინელი ცინიკოსი უნდა ვიყო ასეთ დროს ამაზე რომ მეცინებოდეს

• ღორით დავიწყოთ

ნახევარი უკრაინა ამოწყვიტა, ნახევარი სომხეთი და აზერბაიჯანიც თან მიაყოლა და ახლა ჩვენი დროაო. --> არადა ნახევარი უკრაინა რაიმე სტიქიურ უბედურებას რომ ემსხვერპლა ვიტყოდით არა უშავს ისედაც ბევრნი არიანო, ან სულაც ფეხებზეც არ გვკიდია რომ სადღაც აფრიკაში ყოველდღიურად შიმშილით და ავადმყოფობით გაცილებით უფრო მეტი ადამიანი იღუპება, მაგრამ რადგან მეზობელ სახლში გაჩენილი ხანძარი შეიძლება ჩვენც შეგვეხოს ამიტომ შევშფოთდით, შევძრწუნდით და წარმოშობის ისტორიას დავუწყეთ ქექვა.

დავადგინეთ:

რომ თურმე ხელოვნურად იქნა შექმნილი ლაბორატორიებში რუსების, მასონების, ამერიკელების, იაპონელების და სხვათა მიერ ( როდის როგორ გვაწყობს)

მე მომიტევეთ აბსურდული თეორიისთვის და აღნიშნული ვირუსი კაბინეტებში შექმნილი უფრო მგონია. მერე ინტრიგას დახარბებულმა ტელევიზიებმა ისე ატრიალეს აბრუნეს და აბუქეს რომ თავადაც დაიჯერეს და სხვებიც დააჯერეს. მოსახლეობამ კი უმალ დაივიწყა ( ან არც არასდროს სცოდნია) რომ ვირუსისაგან მსოფლიოში ყოველწლიურად ისედაც ათასობით ადამიანი იღუპება, ჩვეულებრივი გრიპის გართულებისგან კიდე 2 იმდენი. კაცობრიობამ საკუთარი ორგანიზმის დეტალურად შესწავლა დაიწყო და რა თქმა უნდა აღმოაჩინა რომ ავად არის. ქადაგად დავარდა ნახევარი მსოფლიო და ის უწყინარი ცხოველი ვერც კი მიხვდა როგორ აღმოჩნდა ამ გაუგებრობაში. მასობრივმა ფსიქოზმა იქამდე მიაღწია რომ აფთიაქებში ნიღბები გაქრა.. მართლა რომ გჭირდებოდეს ვერ იშოვი.

ამდენი ნიღბოსნის დანახვაზე კი რატომღაც ჩვენი ცნობილი აფორიზმი მაგონდება და ვგრძნობ როგორ ვერ ვიტან პანიკას. არადა თავად ყველაზე მსხვილი პანიკიორი ვარ ( ან ვიყავი) ფაქტია რომ მაგიური ფორმულა H1N1 სულაც არ მაშინებს, რადგან მწამს:

ადამიანს ემართება ის რისიც ყველაზე მეტად ეშინია.

შიშის საფუძველი რომ ნამდვილად არ არსებობს ამაზე ნუ ვიდავებთ. - "შაჰ-აბასმა ვერაფერი დაგვაკლო და ვირუსიანი ღორი რას გვიზამს?!" ვარიაცია ფრაზისა- " შაჰ-აბასმა ვერ დააჩოქა საქართველო და არყით გაჟღენთილი დათვი რას დაგვაკლებს- ო?!"

• 2012

მე როგორც მახსოვს სამყაროს აღსასრულს ჯერ კიდევ 10 წლის წინ 2000-ში ელოდებოდნენ თუმცა მე რა მოსატანი ვარ რაც კაცობრიობა არსებობს იმ დღიდან ელიან.

"ჩურჩულებდნენ 1000 წლისთვის დანიშნული წარღვნა 1110 წლისთვის გადაუტანია ღმერთსო "

ანტიკურ ხანაში ერთ ბრძენს უთქვამს:" ახალგაზრდები უფროსებს არას უგონებენ როგორც ჩანს სამყაროს აღსასრული მოახლოვდაო"

აი ასე გაჩენის დღიდან ველით...

თანაც ცნობისმოყვარეა ადამიანი თავისი თვალით სურს იხილოს სამყაროს აღსასრული. ვინმეს რომ ეთქვა "ის ცნობილი მოვლენები" 2012 -ში კი არა 2112 -ში მოხდებაო ყურსაც კი არ შეიბერტყავდა არავინ, თან ოდნავ გულიც დასწყდებოდათ რომ თავისი თვალით ვერ იხილავდნენ ცის დედამიწაზე ჩამოსვლას

და ყველა დარწმუნებულია რომ როცა აღიგმევა ქვეყანა პირისაგან მიწისა თავად გადარჩება .. მარტო კი არა ვინმე საპირისპირო სქესის წარმოამდგენელთან ერთად მაგ: სელმა ჰაიაკთან ან ტომ კრუზთან და შემდეგ მათ ერთობლივად დაეკისრებათ იმ რთული მისიის შესრულება, როგორიცაა დედამიწაზე სიცოცხლის გაგრძელება - როგორც წერილ არს ჰოლივუდში.

რადგან ჰოლივუდში ვართ იმასაც გეტყვით რომ ვიღაც უნიჭო რეჟისორს ასევე უნიჭო ფილმი გადაუღია, რომელის მსოფლიო პრემიერაზეც ( რომელიც რატომღაც თბილისში გაიმართა) იმდენი ხალხი მისულა გაგიკვირდებათ და თბილისის მერიც კი გარეთ დარჩენილა ..

ასე ამბობენ...

პრემიერიდან გამოსულნი შეძრწუნებულნი იმასაც ამბობდნენ :

" მსოფლიო პრემიერა თბილისში იმიტომ გაიმართა რომ ის ცნობილი
მოვლენები 2012-ში სწორედ აქედან აიღებს სტარტსო."

( ეს რა თქმა უნდა იმ უნიჭო რეჟისორმა იწინასწარმეტყველა)

კარგია საქართველოში!

იმდენად ამბიციურნი ვართ რომ მსოფლიოს აღსასრულიც კი გვინდა ჩვენგან დაიწყოს