მიმართვა რადიო-სადგურის მფლობელებისადმი :)

თავს არ ვუტყდები რომ Jobs.ge-ზე ვაკანსიების თვალიერების რეჟიმიდან ტრენინგების თვალიერების რეჟიმზე გადავერთე. ახლა უკვე თითქმის ყველა ტრენინგი და სტაჟირება მაინტერესებს რაც კი აქამდე დაგეგმილა და დაიგეგმება. და ჩემი cv-იც ძველი ჩინოვნიკის ჯიბესავით იტენება ტრენინგებით, სტაჟირებებით, სერთიფიკატებით, თუმცა ჰოი, საოცრებავ (!) და დამსაქმებელნი მას რატომღაც ისევე ეჭვის თავლით უყურებენ, როგორც ზემოთ ნახსენებ ძველ ჩინოვნიკს.

მარტს სჩვევიაო ახირება უაზრო.

და ბოლო 2 თვეა რადიოში მუშაობა მომინდა. ხო აი ისევე არალოგიკურად და უეცრად მომინდა, როგორც შუაღამისას გამოღვიძებულ ორსულ ქალს ატმის კომპოტი, ან შუა ზამთარში დედაბერს - მარწყვი.
ვაცნობიერებ, რომ არც შესაბამისი განათლება გამაჩნია და არც ბიძა – საკუთარი რადიოსადგურით, მაგრამ რადიოში მუშაობა მაინც მინდა. სურვილს არავის ვუმხელ და მხოლოდ ქვეცნობიერის დონეზე დავატარებ უსარგებლო, მაგრამ საგვარეულო ჩემოდანივით.
1 თვის შემდეგ სოფი მწერს facebook-ზე …

"წუხელ დამესიზმრა, ვითომ რადიოს ვუსმენდი ავტობუსში და უცებ წამყვანი აცხადებს, ნინო ბექაური ვარო :ლოლ: მეთქი, ყოჩაღ ჰექსე! რას არ ნახავს ადამიანი."

არ ვიცი რა ჰქვია ამას, მაგრამ რადგან როგორც სურვილი, ასევე სიზმარი, ორივე ქვეცნობიერია შეიძლება ითქვას რომ სოფის და ჩემმა ქვეცნობიერებმა ზედმეტად კარგად გაუგეს ერთმანეთს.

ამის შემდეგ ვაწყდები თემას ფორუმზე “ რა არის საჭირო რადიოში მუშაობის დასაწყებად?“, სადაც

Charles IX წერს:

1. უნდა იცოდეს ქართული
2. უნდა მეტყველებდეს ნორმალურად და გამართულად
3. ზოგადი განათლება - მინიმუმ "სამი მუშკეტერი" უნდა ჰქონდეს წაკითხული
4. ჟურნალისტური "ხვატკა"
5. ინტელექტი (საშუალო მაინც)

ვსაუბრობ ე.წ. მოლაპარაკე რადიოს და არა ეთერში ჩართული მაგნიტოფონის შესახებ.
ანუ ეს ყველაფერი არ ეხება თბილისში არსებული რადიოების 90%-ს.
იქ საკმარისია:

1. უძვლო ენა
2. ჰევი მეტალის ოპერისგან გარჩევის უნარი
3. განათლება "სამი გოჭის" დონეზე
4. ცნობილ გამოთქმაში "ტაქსის შოფერი რა პრატივნი როჟაა" თუნდაც ერთი სიტყვის ქართული შესატყვისით შეცვლის უნარი...

ნუ ეს რა თქმა უნდა ნახევრად ხუმრობით, მაგრამ როგორც მთლიანი თემის დეტალურად წაკითხვის შედეგად გაირკვა რადიოში სამუშაოდ საჭიროა:

• გამართული მეტყველება,
  
• ინტელექტი,
  
• კომუნიკაბელურობა.

ყოველივე ამის შემდეგ აღარ ვწუხვარ, რომ არ მაქვს სპეციალური განათლება, თუმცა ვწუხვარ, რომ არ მყავს ბიძა საკუთარი რადიოსადგურით.

სწორედ ამიტომ მსურს, რომ ჩემმა ქვეცნობიერმა რომელიმე რადიოსადგურის მფლობელის ქვეცნობიერშიც შეაღწიოს (რადგან ეს ასე კარგად ეხერხება) და უთხრას რომ ჩემგან არც თუ ისე ცუდი რადიოწამყვანი დადგებოდა.