კუპიდონის სიბრმავის შესახებ ანუ მე(ც) მიყვარს...

დამთაგეს :)
"5 რამ, რაც ყველაზე მეტად მიყვარს"

ხუთი ძალიან ცოტაა მაგრამ ვცდი:

• გამოცდები

ასე ვიწყებ იმიტომ რომ თავიდანვე ფსიქიკურად შერყეული გეგონოთ, მეორეც იმიტომ რომ დარწმუნდეთ მითი კუპიდონის სიბრმავის შესახებ, მთლად მითი არ ყოფილა. ხოლო თუ გაინტერესებთ რატომ მიყვარს შეგიძლიათ ნახოთ ეს პოსტიც - "მე მიყვარს გამოცდები!"

• თეატრი

საოცარი მაგია აქვს თეატრს - ჯდები მუქ შინდისფერ, ოდნავ ხაოიან სავარძელში და საერთოდ აღარ გახსოვს და აღარც გაინტერესებს არაფერი - არც შენს გარშემო არსებული ხალხი, არც გარეთ დატოვებული პრობლემები, არც აწკრიალებული ტელეფონი.
მოკლედ, მეც იმ ხალხთა არმიაში მიგულეთ გულითადად რომ წუხან თანამედროვეობამ თეატრის გზა დაავიწყაო ხალხს.
ყველაზე მეტად კი ვერიკო ანჯაფარიძის სახელობის ერთი მსახიობის თეატრი მხიბლავს აქ იმხელა სიმყუდროვე, სითბო და უბრალოებაა რომ...

• პოეზია

საერთოდ ლიტერატურა და წიგნები ჩემი ყველაზე დიდი სიყვარულია, თუმცა ცალკე მაინც პოეზიას გამოვყოფ, რადგან ვფიქრობ რომ არა პოეზია არ იქნებოდა მუსიკა, არ იქნებოდა ცეკვა, არ იქნებოდა სიყვარული. არ იქნებოდა საერთოდ არაფერი.
სულ ვამბობ ღმერთმა არ მომცა ნიჭი მეწერა ლექსები, სამაგიეროდ მომანიჭა უნარი მეგრძნო ისინი.
ბედნიერი ვარ რომ როდესაც ვკითხულობ ან ვუსმენ ისინი ჩემთვის გაცილებით უფრო მეტია ვიდრე უბრალოდ დასაზეპირებელი სიტყვათა რახა-რუხი.

• მითოლოგია

ლენინი წერდა - "მითები კაცობრიობის ლამაზი სიზმარიაო"ამ სიზმარმა ბავშვობიდან რომ მომხიბლა მგონია მის მერე არც გავზრდილვარ და არ გამღვიძებია. დაუსრულებლივ შემიძლია ვიქექო მით. ლექსიკონებში, დაუსრულებლივ შემიძლია ვისმინო და ვიკამათო ამ თემაზე. მითოლოგიური ბლოგიც კი შევქმენი ცოტა ხნის წინ სადაც თითოეულ მითოლოგიურ პერსონაჟზე ვაპირებდი ცალკე საუბარს -თუმცა შემდგომში გადავწყვიტე ეს თემა არც ისე ბევრისთვის იქნება საინტერესო მეთქი და შევეშვი.

• ოთარ ჭილაძე

უკომენტაროდ მეთქი დავწერდი - მაგრამ აბა რა ნამუსით უკომენტაროდ?
ის აუფერულებს ყველას და ყველაფერს, რაც აქამდე არსებობდა.
ადამიანი რომლის ნაწარმოების წაკითხვის შემდეგ მიხვდებით რომ აქამდე მხოლოდ გეძინათ, სადღაც მიწურში იჯექით და მხოლოდ ატყუებდით თავს რომ რაიმე მნიშვნელოვანს აკეთებდით. მას ერთდროულად შეუძლია განახოს რა უაზროა შენი ცხოვრება და მოგცეს იმედი რომ ყველაფერი შესაძლოა შეიცვალოს.
ადამიანი რომლის შესახებაც ( მის სიკვდილამდე) ბევრმა არაფერი იცოდა - ეს ალბათ იმიტომ რომ მთელი ცხოვრება უბრალოდ წერდა.


სვით, ზურიუს, ვასასი, წყარო, ეკა

და თქვენ როგორ ფიქრობთ მართლა ბრმაა კუპიდონი? :)