ხუთიოდე რჩევა, ანუ რეკომენდაცია ჰექსესგან

"მოდი ნახეო, მიველ ვნახე და ისა სჯობდა რომ არ მენახა."

ღმერთია მოწმე არ ვიყავი ხმის ამომღები.
თბილისში ჩამოსულს ეკას წერილი რომ არ დამხვედროდა "დღის შოუს" გადაცემის ლინკით - თვალმან შენმან უნდა იხილოს და ენამან შენმან უნდა აღწეროსო.
მეც არ მჩვევია ბევრი ლაპარაკი, ამიტომ მოკლედ ვიტყვი.



რჩევა #1 - შეუცვალეთ გადაცემას სახელი - დაარქვით "გამათხოვე"

ლოგიკა მომთხოვნი რამეა და გაანჩხლებული დედაბრის სიკერპით მოითხოვს, რომ გადაცემის სახელი მის შინაარს შეესაბამებოდეს. სტატისტიკა კიდევ უფრო ჯიუტი მეცნიერებაა და შემაშფოთებელ ციფრებს იმის შესახებ თუ რამდენი "შოუა" უკვე საქართველოში პირდაპირ თვალებში გვთხრის. ამიტომ გადაცემაში გაჟღერებული ფრაზებიდან ("მე დავასკვენი, რომ ერთადერთი ჩვენ რაც გვაკლია კაცია. " ჩვენ რატომ ვერ ვპოულობთ კარგ კაცებს" "როგორ მინდა ეკასავით ვბრწყინავდე, ის აშკარად დაკმაყოფილებული იყო" და მსგავსი.) გამომდინარე აღნიშნულ შოუს დაერქვას "გამათხოვე"! სამართლიანობა კი მოითხოვს რომ გადაცემის წამყვანები მაშინვე შეიცვალონ, როგორც კი სათაურში აღწერილი მიზანი მიღწეულ იქნება - სხვასაც ხომ უნდა?

რჩევა #2 - შეურჩიეთ ია ფარულავას პედაგოგები.

სიტყვა პედაგოგისთვის მრავლობითის ნიშანი "ებ" ჩემი გრამატიკაში განსწავლულობის საილუსტრაციოდ არ მიმიბავს. დაკვირვებამ ცხადყო რომ ბევრია საჭირო:

• ქართული ენის - ის რაც უმრავლესობას ყველაზე მეტად გვჭირდება, მაგრამ არ გვყავს - სწორედ ეს უკანასკნელია ( ვინ რა გაიფიქრა არ ვიცი, მაგრამ ქართული ენის მასწავლებელი დღეს ისევე საჭიროა როგორც ტელევიზორის პულტი, კომპიუტერის მაუსი, ან მობილურის დამტენი)
  
• მეტყველების - იმის გასაანლიზებად რომ ჟარგონებით საუბარი, მეგობრებთანაც არ არის რეკომენდირებული, რადგან ნარკოტიკივით იცის შეჩვევა. ისე რომ შესაძლოა რომელიმე საქმიან შეხვედრაზე, ბრიფინგზე, ან თუნდაც გადაცემაში "კაროჩე" "იმენნა" "ძმაო" ან თუნდაც ყოვლად უწყინარი "ნასკი" წამოგცდეს.
• ეთიკა - მორალის - ასეთი არსებობს თუ არა არ ვიცი, მაგრამ თუ გავითვალისწინებთ იმას რომ საქართველოში განურჩევლად ყველა, განუწყვეტლივ მორალს კითხულობს, თანაც არა მხოლოდ უნივერსიტეტებში, არამედ ყველგან სადაც მინიმუ 2 კაცია შეკრებილი, 1 კამერა იღებს და ან publish ღილაკზე შეიძლება მაუსის დაწკაპუნება და თანაც ამას ყოველგვარი ანაზღაურებისა და დაყვედრების გარეშე აკეთებს, შეგვიძლია დავასკვნათ, რომ ამ მხრივ საქართველო მდიდარია. თუმცა აღნიშნული პედაგოგის ნაკლებობა ყველაზე მეტად აქ იგრძნობოდა. არადა რა დიდი მიხვედრა სჭირდება იმას რომ ზედმეტად არაეთიკურია რომ ადამიანი, რომელსაც დაშორდი საჯარო სასაცილო ფიგურად არ უნდა აქციო, არ იქილიკო მის შავ "ტუფლებზე", თეთრ "ნასკებზე" და პროფესორულ გარეგნობაზე. თუმცა პროფესორული გარეგნობა რატომ არის საქილიკო ვერ ვხდები, ალბათ იმიტომ რომ მე სიმპატიური პროფესორები მყავს.
  
• მანერების პედაგოგიც გვჭირდება იმის ასახსნელად რომ ხელები ბუზის გამნიავებელივით არ უნდა იქნიო, სხვას სიტყვის დამთავრება აცალო და ნაყინის (უფრო უკეთესი იქნება თუ ვიტყვით მაროჟნის) გამყიდველივით არ იყვირო, რადგან აღნშნული ქმედებები სულაც არ იქნება განხილული, როგორც ენერგიულობა.
  

რჩევა # 3 დეტალურად იქნეს განმარტებული წარმატებული ქალის კრიტერიუმები.

ამავე დროს მე პირადად მოვითხოვ, რომ ამ კრიტერიუმიდან სასწრაფო წესით იქნეს ამოღებული 4-ჯერ განათხოვრობა (მათ შორის პირველად 15-16 წლის ასაკში) აბურდული პირადი ცხოვრება და ტუჩზე მიკერილი ფრაზა "ოჰ ეს ჩმორი კაცები ჩემს პოპულარობას ვერ უძლებენ"

რჩევა # 4 ფადი ასლის

რჩევა არა თხოვნაა, ცოტა ხანში შეიძლება ხვეწნაზეც გადავიდე და მალე შესაძლოა მუხლიც გაგვიხდეს მოსაყრელი ამ კაცის წინაშე მთელ საქართველოს.
დაუბრუნდეს, ცოლად შეირთოს,მანქანა აჩუქოს, უწინდელივით სადმე შორს წაიყვანოს და იყოს ისე როგორც ადრე: დაჯდეს, ფეხი ფეხზე გადაიდოს, იკითხოს სხვისი გამოშვებული გლამურული ჟურნალები, უყუროს სხვის წაყვანილ გლამურულ გადაცემებს (ამერიკაში ეგ უკეთ გამოსდით) იაროს სპა-სალონებში და საერთოდ აკეთოს ყველაფერი რაც მოესურვება, ოღონდ ჩვენ თავი დაგვანებოს.

რჩევა #5 პრაიმ-ტაიმსს


გავიგეთ რომ ბედნიერი იყო ფადისთან, ისიც გავიგეთ რომ ფადის "კალდუნა" ცოლი ჰყავდა. ის ხომ ყველამ გავისისხლხორცეთ, რომ ახალ ქმარს ეძებს და მალე თუ ვერ იპოვა მონაგონი იქნება თემურ-ლენგი და მურმან ყრუ ერთად :)იმასაც მივხვდით, რომ ფადი იმიტომ დაშორდა იას, რომ ხელი დაეღალა (კონსერვების გახსნისგან, რა გაფართოებული თვალებით მოაშტერდით მონიტორს?) ისიც ვიცით რომ შუბლის ბოტუქსი აქვს გაკეთებული, ფული რომ ჰქონდეს ყველაფერს ერთად გაიკეთებდა, სულით-ხორცამდე, თხემით ტერფამდე ლამაზი და წარმატებული ქალი რომ არის მაგასაც ვხედავთ და სანამ საგამოცდო საკითხებში არ შეიტანენ ფადი ასლისა და ია ფარულავას სიყვარულის ისტორიის გასაიდუმლოებულ დეტალებს მანამდე არ შეეშვებით ამაზე წერას?


p.s.
"თუ სხვის თეთრეულში ქექვა არ გხიბლავს, მაშ სამრეცხაოსთან რა გინდოდაო?"- გკითხავს ნებისმიერი ყვითელი პრესის რედაქტორი იქედნური ღიმილით. არადა გულწრფელად რომ არ მაინტერესებს ვინ ვის რამდენ კვერცხიანი ტორტი გამოუცხო დაბადების დღეზე და ვინ სად და რამდენად იყიდა კბილის გამოსაჩიჩქნი ჩხირი, ამიტომაც არ ვკითხულობ იმ ჟურნალს. მაგრამ რათ გინდა გადაცემა არ გავა პრაიმ ტაიმსის ახალი ნომრის შინაარსი რომ არ მოყვეს წვრილად. ნებისმიერი ინფორმაციის წყაროდ პრაიმ ტაიმსის დასახელება ტრადიციად ექცათ - - "არ თხოვდები? პრაიმ ტაიმსში ეწერა თხოვდებაო." - "ორი შვილი გყავს? პრაიმ ტაიმსში წავიკითხე 8 ყავსო." " დედამიწა მრგვალია? პრაიმ ტაიმსმა თქვა ტრაპეციაა და ჯორდანო ბრუნო მეზობლის ქალთან არშიყის გამო დაწვესო."
მგონი იმ დღესაც მოვესწრები სასამართლო სხდომაზე ელ ვუდსის მიმდევარი რომელიმე ადვოკატი რომ წამოდგება და უტყუარ მტკიცებულებად პრაიმ ტაიმსის ნომერს ააფრიალებს.

მოკლედ. წაიკითხოს მან ვისაც აინტერესებს, რადგან არ ვკითხულობ ე.ი. არ მაინტერესებს და მოხარული ვიქნებოდი თუ ყოველ წამს გასაყიდი იაფფასინაი ბიჟუტერიასავით თვალში არ შემჩხირავდნენ.

რეპლიკა: მე ჩემი მითქვამს ბატონებო!