"იუმორინას ერთი კანჭი ნახევარ სამეფოს მირჩევნიაო"

თქვენ რომ იცოდეთ, იმედმა გუშინ რა იკადრა, იმასთან შედარებით მაგათი "იმიტირებული ქრონიკა" "დუტას ზღაპრებად" მოგეჩვენებოდათ. მივყვეთ ქრონოლოგიურად:

• "ხხოოორციიიი, ანუ აი, აი, ახლა რა იგრძენით?!"

ჯერ იყო და დღის 4 საათზე "თბილისი ლაივის" აჟიტირებულმა წამყვანმა ლამის წიხლისკვრით ჩარეკა ბომონდის რამდენიმე თვალახვეული წარმომადგენელი ახალ გახსნილ სტრიპტიზ-კლუბში, სადაც სტრიპტიზიც ვიხილეთ, ლესბო სექსის ელემენტებსაც შევავლეთ თვალი, სტრიპტიზ - კლუბის ფასებიც დეტალურად გავიგეთ და ისიც თუ რას გრძნობდა მალხაზ ქვრივიშვილი, როდესაც "სნეგურაჩკის" ფორმიანი მოცეკვავე ჯიუტად მიიწევდა მისი მუხლებისკენ. ვერ ვიტყვი ამ დროს მას ლაპარაკის დიდი სურვილი ჰქონდა მეთქი, მაგრამ რა ექნა? თიკო ადგა თავზე მიკროფონით : "გეხვეწები რა, მითხარი რა შეგრძნებააო" (ზოგჯერ მართლა ძალიან მწყდება გული, რომ რვა ქალზე 1 კაცი მოდის.)

ერთი ასათიანის გამოჩენა აკლდა კითხვით "არ არის ეს რთული" და შეგეძლოთ ჩემი თავი მისსავე სახელობის დაწესებულებაში გეძებნათ, მაგრამ რადგან ჭკუიდან აცდენას ოდნაც ავცდი, იმასაც გეტყვით, რომ რამდენიმე წუთიან სიუჟეტში წამყვანმა იმხელა დაგეშილობა გამოავლინა ხორცის მიმართ, კარგად გაწვრთნილ ნაგაზს ჩამოუვიდოდა დორბლი.

და შეიძლება დღესდღეობით ბევრმა არასრულწლოვანმა გაცილებით უფრო მეტი იცის სექსის შესახებ, ვიდრე იქ მჯდომმა ყბაჩამოვარდნილმა 4 მამაკაცმა, მაგრამ აღნიშნულის დღის საათებში გაშვება ნებისმიერ ქვეყანაში სასტიკ კანონდარღვევად ითვლება და ნებისმიერ ქვეყანაში არხს ეს არ შერჩებოდა, მაგრამ ნათქვამია "იმიტირებული ქრონიკა თუ შეგრჩა, აწი რაღა დაგხურავსო" და მართალიც არის.

• "მართლა, იუმორინა ჯობიააააა"

"ვერ წაიყვანთ მერე რომ დაგიტოვებიათ აქ?

-იცით ის იქაურობას ვერ ეგუება?

-ძალიან არ გაარჩიოს ახლა მაგან - თბილისშია თუ ფოთში"

(მ/ფ "უძინართა მზე")

მთელი კვირა ანონსდებოდა რომ " ხალხის რჩეული/People's Choice Award 2011", რომელიც რამდენი დღის წინ გაიმართა ამერიკაში, გავიდოდა. ჩვენც გემრიელად მოვკალათდით ეკრანებთან, დანა-ჩანგალი მოვიმრჯვეთ და მალევე მიხვდვით, რომ რაღაც იმას არ გვაჭმევდენენ, რასაც შეგვპირდნენ. ნუ იტყვით და თურმე 1 წლის წინანდელ გადაცემას გვაჩვენებდნენ. ეს კი დაახლოებით იგივეა მსოფლიო ჩემპიონატის საყურებლად შეკრებილ საზოგადოებას პირში ბურთი ჩაჩარო და წინა მსოფლიო ჩემპიონატის ფინალი გაუშვა - ვინ რას გაიგებს, ბურთი ყველა მრგვალიაო.

ვთქვათ და მე მომაკლდა პაწა ყურში და სწორედ 2010 წლის შოუ ანონსდებოდა, კიდვე უფრო უარესი მაშინ ჩვენთვის.

იყო დრო ჩვენს ბედრკულ ცხოვრებაში, როდესაც უცხოური ფილმები ბარე 5 წლის დაგვიანებით შემოდიოდა ჩვენთან და ჩვენ ეს შუქის მოსვლაზე უფრო გვახარებდა. მაგრამ ახლა მგონი ცოტა უფრო სხვა დროა და საუკუნეში, სადაც ეშტონ კატჩერი მობილურით აკეთებს პირდაპირ ტრანსლაციას სოციალურ ქსელებზე, ჩვენ განვითარებული, თუნდაც მდგრადად განვითარებადი ქვეყნის მოქალაქეებს საკუთარმა წლის ყველაზე რეიტინგულმა ტელევიზიამ თავი იმ მიყრუებული სოფლის ბავშვებად არ უნდა გვაგრძნობინოს, ყველაზე მაგარი ფილმი ჯერ კიდევ "ტიტანიკი" რომ ჰქონიათ. მე კი გუშინ თაცი სწორედ ესეთ ბავშვად ვიგრძენი და ამისათვის კიდევ ერთხელ დიდი მადლობა "იმედს".

P.s. არხის ხელმძღვანელეობაში ვინ მოვიდა არ ვიცი, მაგრამ ფაქტია ლუარსაბივით რომ არის წამოთხლეშილი ტახტზე და დროდადრო ზლაზვნით გასძახებს დარეჯანს:

-"დედაკაცო, დღეს ლესბო შოუები გავუშვათ, თუ ისევ ძველი პორნოებიო?"

რაზედაც დარეჯანი სამართლიანად შეიცხადებს:

- " რას ამბობ ადამიანო "იუმორინას" ერთი კანჭი ( თუნდაც 10 წლის წინანდელი) ნახევარ სამეფოს მირჩევნიაო"

მსგავსი პოსტები:

• "მიმართვა იმედს!"

• "რა დროს სარჩელია, პრეზიდენტი მოგვიკლეს!"