ბათუმი, სადაც ცივა

"–სად მიდიხართ?

–ბათუმში

–ბედნიერი ყოფილხართ

–რატომ?

– ასე მგონია ყველა ბედნიერია, ვინც ბათუმში მიდის. "

ეს სიტყვები ერთ–ერთმა ტაქსისტმა მითხრა ორი წლის წინ, როდესაც სადგურზე მივყავდი. ასეთია წარმოდგენები ბათუმზე: თბილი, მზიანი, გარუჯული, უდარდელი, უპრობლემო და ბედნიერი.  თუმცა ალბათ ყოველთვის ასე არ არის, მაგალითად ზამთარში, როცა თოვს, ელექტრო ენერგია ითიშება, და ქალაქის სრული პარალიზება ხდება. თუმცა ვის აინტერესებს როგორია ბათუმი ზამთარში, როდესაც არც მზეა, არც შუქი, არც ნაყინის ჭამა და მზეზე გარუჯვა შეიძლება,  სრულიად მოკლებულია ასეთი ბათუმი ინტერესს.

აბა  მეჩეთის მინარეთის  დემონტაჟზე ყოფილიყო საუბარი,  ხომ ვიცი   ჟურნალისტები კისრისტეხით ჩაცვივდებოდნენ  და "უფლებადამცველნი"  ერთმანეთს დაასწრებდნენ იმის თქმა რომ ეს ადამიანების უფლებების უხეში დარღვევაა.  თითქოს სიცივით გაყინვას პირდაპირ ითვალისწინებდეს კონვენცია.

სოციალურ ქსელებში ისიც წავიკითხე ახია ბათუმზეო! რატომ არის ახი თუ იცით? იმიტომ რომ არჩვენებში ბათუმში ნაციონალებმა ყველაზე ნაკლები ხმა მიიღეს – "უმადურები, გადაყოლილი იყო მიშა მაგათზე". ეს ის შემთხვევაა,  როცა ხალხის სიძულვილი პოლიტიკოსების სიძულვილს აჭარბებს. შემთხვევა, როდესაც ხვდები რომ მანამდე ვერ შევდგებით საზოგადოებად,  სანამ ფანატიკოსი  "ისტები" ვართ და რომელიმე პოლიტიკური პარტიის სიყვარულ/სიძულვილი უფრო ჭარბად გაგვაჩნია ვიდრე საღი აზრი.

ბათუმი, ისეთი როგორსაც არ ვიცნობთ :)
mtvarisklubi.com

რატომ არ აირჩია ბათუმმა ის ვინც "გადაყოლილი" იყო მათზე არ ვიცი, შესაძლოა იმიტომ რომ ორივე მხარეს სხვადასხვანაირად ესმოდა სიტყვა  " გადაყოლა", ან შეიძლება იმიტომ   რომ ბათუმი უფრო დიდია ვიდრე მისი  ბულვარი.  და კიდევ ბევრი "ან იქნებ" არსებობს, მაგრამ ახლა ფაქტია რომ ხელისუფლებას 4 დღეა ვერაფერი გაურკვევია, საზოგადოებას უკრაინის ამბები უფრო ადარდებს და მასმედიას  კი ჯაჭვლიანის გინება უფრო აინტერესებს. აშკარად უფრო რეიტინგული თემებია, ბოლოს და ბოლოს ვის რათ უნდა ისეთი  ბათუმი,  სადაც თოვს და ყინავს?!

და კიდევ ეს მანუგეშებელი სტატუსები:  "ნუ ღელავთ ყველაფერი  კარგად იქნება/ზამთარი დროებითია", ამის დამწერმა ჯობს საერთოდ არაფერი  დაწეროს. ყველაფერი მართლაც კარგად იქნება – ელ. ენერგია  აღდგება, თოვლი დადნება, ბოლო–ბოლო ზაფხული მოვა (ის ზაფხული ყველას რომ გვიყვარს ბათუმში)  მაგრამ როდესაც ყველაფერი ჩაივლის  აჭარას ალბათ არასდროს დაავიწყდება ხელისუფლების უმოქმედობა, მასმედიის ინდეფერენტულობა, საზოგადოების გულგრილობა, ალბათ არც იმ მაღაზიის მეპატრონეებს დაივიწყებენ სანთელი 15 ლარი რომ გახადეს და დახლებიდან პური გააქრეს, არც იმ ტაქსისტებს  მგზავრობას ცეცხლის ფასი რომ დაადეს. ბათუმის თოვლი ლუსტრაცია იყო, გამოაჩინა სად არის რეალურად ჩვენი ადგილი. 

P.s. ის ტაქსისტი კი, შესავალში რომ ვახსენე, მართალი ყოფილა:  ბედნიერია ყველა ვინც ბათუმში მიდის. 
სტუმრად ყოველთვის კარგია ყოფნა. 

მართლაც და –  თუ რედისონში ცხოვრობ,  დილით ჭიქა ყავასა და კრუასანების თანმხლებით ფეისბუქს სქროლავ,  ვითომ რატომ არ უნდა იგრძნო თავი ბედნიერად?!